,
News

මේ අධිවේගයේ යන ගමන් කතා කරලා පක්ෂෙ මාරු කරපු අයත් ඉන්නවා – මහින්ද අධිවේගය විවෘත කරමින් කියයි

මේ රටේ සිදුකළ ව්‍යාපෘති අතරින් අධිවේගී මාර්ග ව්‍යාපෘතිය තරම් විවේචනයට ලක්වූ වෙනත් ව්‍යාපෘතියක් නොමැති තරම් බව අගමැති මහින්ද රාජපක්ෂ ප්‍රකාශ කළේය.

දක්ෂිණ අධිවේගී මාර්ගයේ මාතර සිට බරවකුඹුර දක්වා කොටස විවෘත කිරීමේ අවස්ථාවට සහභාගී වෙමින් පෙබරවාසි 23 ඉරිදා අගමැතිවරයා මේ බව ප්‍රකාශ කළේය. එහිදී වැඩිදුරටත් අදහස් දැක්වූ ඔහු කියා සිටියේ “හරියට මහා ගහක් වගේ, ගහට කොටන්න එන පොරෝ කාරයාටත් ගහ සෙවන දෙනවා. ඒ වගේ තමයි මේ පාරත්” යැයි ඔහු කියා සිටියා.

දක්ෂිණ අධිවේගී මාර්ගයේ මාතර පාලටුව අධිවේගී පිවිසුමේ සිට මැති ඇමතිවරුන් ඇතුළු පිරිස අඟුණකොළපෑලැස්ස බරවකුඹුක අධිවේගී පිටවීමේ දොරටුව දක්වා පැමිණියහ.

බරවකුඹුර අධිවේගී පිවිසුම ආසන්නයේදී උත්සව සභාව පැවැති අතර එහිදී අගමැති මහින්ද රාජපක්ෂ උත්සව සභාව අමතමින් මෙසේද පැවසීය.

‘‘අධිවේගී මාර්ගය තරම් විවේචනයට ලක්වූ වෙනත් ව්‍යාපෘතියක් මේ රටේ නැතුව ඇති. හරියට මහ ගහක් වගේ. ගහට කොටන්න එන පොරෝකාරයාටත් ගහ හෙවන දෙනවා. ඒ වගේ තමයි මේ පාරත්. මේ පාර විවේචනය කරන්න එන අයත් විවේචනය කරලා පාර හදපු අපිව ගෙදර යැවූ අයත් අද යන්නේ එන්නෙ මේ පාරෙ. ඒ පාරෙ ඇවිත් තමයි අපිට බැනල යන්නේ. පාර හදන්න ගිය වියදමින් රත්තරන්වලින් කාපට් දාන්න පුළුවන් කියූ අයත් හිටියා.

2015 ආණ්ඩුව පෙරලන්න කතා කරන්න ගියෙත් හයිවේ එකේ බව පස්සේ කාලෙදි ලොකුවට කිව්වා. හයිවේ එකේ යන ගමන් සැටලයිට් ෆෝන් එකෙන් කතා කරල තමයි ආණ්ඩුව පෙරලුවේ. රටට වෛර කරන පිරිසට දැන් මේ රටේ ජනතාව නැවත ස්ථානයක් හදල දීල තිබෙනවා.

අධිවේගී මාර්ගය හදනකොට කළ එක් විවේචනයක් තමයි මේ වගේ මාර්ගවලින් කාටද ප්‍රයෝජනයක් තිබෙන්නේ. සමහරු මාළු ගෙනියන්න කිව්වා. අද මේ ව්‍යාපෘතියෙන් වැඩිපුරම ප්‍රයෝජන ගන්නෙ ලොකු මිනිස්සුද කියල මම අහනවා. අද මේ හයිවේ එක වැහුවොත් රටට මොකක් වෙයිද. රට පස්සට යනව නේද. මොනතරම් රටේ කටයුතු අවුල් වෙයිද මේවා හිතන්න. අපිට විවේචන ආවේ නිකන් නෙවෙයි. අපි මේ කළ ව්‍යාපෘතියෙන් දිස්ත්‍රික්ක තුනක ජනතාවට සේවයක් ලැබුණා.

කොළඹ, කළුතර, ගාල්ල. ඒවායි මුලින්ම සම්බන්ධ වුණේ. මේ රටේ සියයට පහලොවක ජනතාව ජීවත් වුණේ ඒ දිස්ත්‍රික්ක තුනෙයි. දැන් මාතර හම්බන්තොට දිස්ත්‍රික්ක දෙකත් මෙයට සම්බන්ධ වෙනවා. කතරගමට ගියාම පාර අවසන් වෙද්දී ඌව පළාතත් සම්බන්ධ වෙනවා.

මේ පළාත් නැගිටිනවට අකමැති දේශපාලකයෝ ඉන්නවා. අධිවේගී මාර්ගයේ තලගොයි, කබරගොයි දැක්කේ මේ අයයි. මම මේවා කියන්නේ හේතු ඇතුවයි.
2005 චන්ද්‍රිකා මැතිණිය ඉන්න ආණ්ඩුවේ ඉද්දී අධිවේගී මාර්ගයට මුල්ගල් තියල ඇවිත් නාමයෝජනා බාර දීලා මම අත්සන් කළේ. අද අපේ උපන්ගමට අධිවේගී මාර්ගය සම්බන්ධ කරනකොට නැවතත් ජනාධිපතිවරයා මාව අගමැති විදියට නම් කර තිබෙනවා.

මම එදා මහාමාර්ග ඇමතිවරයා විදියට වැඩ බාරගත්තේ එහා කෙළවරේ ඉඳලා මෙහා කෙළවර දක්වා නිදහසේ යන්න බැරි රටක. ඒවා දැන් හුඟක් අයට අමතකයි. මන්නාරමේ මඩු දේවස්ථානයට යන පාර අලුතින් හදාදෙන්න කියා මගෙන් ඉල්ලීමක් කළා. ඉතාමත් හොඳ තත්ත්වයේ පාරක් මම හදල දුන්නා.

මන්නාරමේ බිෂොප්තුමා මට ආරාධනා කළා එම මාර්ගය විවෘත කරන්නට. එදා අපේ රටේ සටන් විරාමයක් ක්‍රියාත්මකව තිබූ කාලයක්. මේවා හුඟක් අයට දැන් අමතකයි. උතුර නැගෙනහිර යනවා නම් කොටින්ගෙන් අවසර ගන්න ඕනෑ. මඩු පාර විවෘත කරන්න නම් මට ලියුමක් දෙන්න කිව්වා කොටි නායකයාට. අගමැතිතුමා වුණත් කොටින්ගෙන් අවසර නැතුව යන්න හම්බවෙන්නෙ නැහැ කියලා ලියුමක් ඉල්ලුවා. මම කිව්වා අගමැති විදියට පාර හදලා ඒකෙ යන්න මට එල්.ටී.ටී.එකෙන් අවසර ගන්න ඕනෑ නැහැ කියලා.

මම එහෙම අවසර ගන්නෙත් නැහැ කිව්වා. හැබැයි එහෙම අවසර ගන්නෙ නැතුව මට ඕනෑ විදියට පාරෙ යන්න දිනයක් මම වැඩිකලක් යන්න කලින් හදල දෙන්නම් කිව්වා. ඒ වගේම මඩුවලට යන්න අපි යුද්ධය අවසන් කරන්න එදායි අපි තීරණය කළේ. එදා සිට අපි පාරවල් හදන්න පමණක් නෙවෙයි. හදපු පාරවල්වල නිදහසේ යන්න පුළුවන් තත්ත්වයකුත් මේ රටේ ඇති කළා. ඉදිරියටත් අපි මේ රටේ පාරවල් හදනවා වගේම ඒ පාරවල්වල නිදහසේ යන්න පුළුවන් තත්ත්වයක් ඇති කරනවා. මැතිවරණයේදීත් මිනිස්සු අපෙන් ඉල්ලුවේ ඒකයි.

අධිවේගී මාර්ගයේ පළමු කොටස ගාල්ල දක්වා ඉදිකරලා ඉතාම ඉක්මනින් ජනතාවට අපි බාර දුන්නා. ඒ දවස්වල දින කිහිපයක් පයින් යන්න බයිසිකල්වලින් මිනිස්සු ඉල්ලුවා. ඒකට අවස්ථාව අපි දුන්නා. මිනිස්සු සතුටු වුණා.

යහපාලන ආණ්ඩුව බලයට ආපු ගමන් මත්තල ගුවන්තොටුපොළ වී ගබඩාවක් කළේ නිකන් නොවෙයි. මත්තල ගුවන්තොටුපොළ පාවිච්චි කරන්න බැරි විදියට විනාශ කළා. වී ගබඩා කරලා වීවලට කළ අපහාසය, අපේ සංස්කෘතියට කළ අපහාසය පමණක් නෙවෙයි ගුවන්තොටුපොළට කළ විනාශයට වග කියන්න ඕනෑ කවුද. මොකක්ද දකුණත් එක්ක තිබෙන වෛරය. අද වෙනකොට ගුවන්තොටුපොළේ තිබෙන වටිනාකම ලෝකයට දැනී තිබෙනවා. කොරෝනා රෝගීන් ආවාම ඒ අය නිරෝධායනය කරන්න පහසුකම් ඇතුව රටට ගත්තේ මත්තල හරහා.

හම්බන්තොටට වරායක් ඕනෑ කියලා තීරණය කළේ එදා ඩී.ඒ.රාජපක්ෂ ඉන්න කාලෙයි. මේක අපිට කතා කළේ ඒ අයයි. නමුත් මේක කරගන්න බැරි වුණා. අපිට චීන රජයෙන් විශාල මුදලක් ලබා දුන්නා. ඒවායින් තමයි අපි මෙය කළේ. වරාය හදද්දි මෙය දකුණෙන් එහාට අරගෙන යන්න ගොඩක් අයට ලොකු වුවමනාවක් තිබුණා. හැබැයි අපි විශාල බාධා, ද්‍රෝහිකම් මැද්දේ දකුණට වරායක් හැදුවා.

යහපාලන ආණ්ඩුව ආපුගමන් කළේ ඒවා විකුණලා දාපු එකයි. දැන් කියනවා විකුණුවේ නැහැ අනූනව අවුරුද්දකට බදු දුන්නාලු. හෙක්ටයාර පන්දහසක්. මේවා මේ රටේ ජනතාවගේ දේපළයි. මේ තත්ත්වය ඇති කරගත්තේ කවුද. මිනිස්සුන්ට බොරුව පුරවලා ඇති කළ වෛරය එදා 2015දී පිටකළා.

අපිව පැරදුනේ නැහැ. අපිව පැරැද්දුවා. ජාත්‍යන්තර කුමන්ත්‍රණත් මේවා ඇතුළේ තිබුණා. මම ඒවා ගැන කතා කරන්නෙ නැහැ. අපි කවදත් පෙදු ජනතාවගේ දේශපාලන වුවමනාවන් තේරුම් අරගෙන වැඩ කළ අයයි.

ඒ වෙනකොට තිබුණ තිබුණ භීෂණකාරී යූඑන්පී ආණ්ඩුවට එරෙහිව කොළඹ සිට කතරමට පාදයාත්‍රා ගියා. කොළඹ ඉඳන් තිබෙන හැම ගල් කැටයක්ම මම පාගා තිබෙනවා. හන්දිවල තිබෙන පිච්චෙන මිනී දැක්කා අපි. මේවා අරගෙන අපි ජිනීවාත් ගියා. ජනතාවගේ දුක් අහගෙන අපි කිව්වා. එදා මම ජනතාවගේ දුක් අදෝනා අහගෙන ගිය මුළු දුරම අද වර්තමාන පරපුරට අධිවේගී මාර්ගයේ සැපපහසුවට යන්න සැලස්වන්න පුළුවන්කම ලැබුණු එකට අපි සන්තොස වෙනවා.‘‘ යැයි අගමැතිවරයා පැවසීය.

ජනාධිපති ගෝඨාභය රාජපක්ෂ, අගමැති මහින්ද රාජපක්ෂ, ඩලස් අලහප්පෙරුම, අමාත්‍ය ජොන්ස්ටන් ප්‍රනාන්දු, චමල් රාජපක්ෂ, මහින්ද අමරවීර ඇතුළු විශාල පිරිසක් මේ අවස්ථාවට එක්ව සිටියහ.

Rivira Ads
To Top