ආරක්ෂක ලේකම් විශ්‍රාමික මේජර් ජෙනරාල් කමල් ගුණරත්න කියා සිටියේ පසුගිය රජය යටතේ පසෙකට දමා තිබූ බුද්ධි අංශ අද ප්‍රතිසංස්කරණය කර ඇති බවත්, රට තුළ කෝවිඩ්-19 පැතිරීම වැළැක්වීම සඳහා වටිනා කාර්යභාරයක් ඉටු කරමින් සිටින බවත්ය.
ආරක්ෂක ලේකම්වරයා අප්‍රේල් 17 දින උතුරු හා නැගෙනහිර භට පිරිස් අමතමින් මේ අදහස් පළ කළේය. රටේ බුද්ධි අංශ විසින් කරන ලද දායකත්වය අගය කරමින් ඔහු කියා සිටියේ, ඔවුන් පසුගිය පරිපාලනය යටතේ පසෙකට දමා, ඉවත දමා, බලයෙන් පහ කර තිබූ නමුත් ඒවා ඵලදායී ලෙස භාවිතා කිරීම සඳහා සමස්ත බුද්ධි පද්ධතියම නව රජය යටතේ ප්‍රතිසංස්කරණය කර ඇති බවයි. අද ඔවුන් කොරෝනා වෛරසය මර්දනය කිරීමට විශාල දායකත්වයක් ලබා දෙන බවද ඔහු කියා සිටියා.
“අද, බුද්ධි අංශ විසින් නිරෝධායනය මගහරින පුද්ගලයින් හඳුනා ගැනීම සහ සොයා ගැනීම සහ තහවුරු කරන ලද රෝගීන් සමඟ සම්බන්ධ වී ඇති වෛරස් වාහකයන් හඳුනා ගැනීම මගින් සුවිශේෂී ප්‍රතිඵල ලබා දී ඇත,” යනුවෙන්ද ආරක්ෂක ලේකම් පැවසීය.
කොරෝනා වෛරසයට එරෙහි සටනේ පෙරමුණ ගෙන සිටින සෞඛ්‍ය ක්ෂේත්‍රයේ, විශේෂයෙන් මහජන සෞඛ්‍ය පරීක්ෂකවරුන්ගේ (පීඑච්අයි) දායකත්වය ගැනද ඔහු ප්‍රශංසා කළේය. මේ අතර, ත්‍රිවිධ හමුදාව සහ පොලිස් නිලධාරීන් ඔවුන්ගේ වෘත්තීයභාවය හා විශේෂඥභාවය සනාථ කර ඇත්තේ කොරෝනා වෛරසය පැතිරීම පාලනය කිරීමට රජය ගන්නා උත්සාහයන්ට සහාය වීමෙන් බවද කමල් ගුණරත්න පෙන්වා දුන්නේය.
“මාර්ග බාධක යෙදීම, නිරෝධායන පහසුකම් ඉදිකිරීම, කොරෝනා වෛරස් ආසාදිත රෝගීන් හඳුනා ගැනීම සහ සොයා ගැනීම දක්වා සහ මහා පරිමාණයෙන් රටේ අවශ්‍යතා ඇති ප්‍රජාවන්ට අත්‍යවශ්‍ය සේවා හා ප්‍රතිපාදන බෙදා හැරීම දක්වා ඔබ ඔබේ හැකියාවන් ප්‍රදර්ශනය කර තිබේ” යැයිද ආරක්ෂක ලේකම්වරයා කියා සිටියා.
සෞඛ්‍ය අවදානම් නොතකා රජයේ කොරෝනා වෛරසය වැළැක්වීමේ වැඩසටහන් සඳහා සහය දැක්වීමට සොල්දාදුවන්, ගුවන් භටයින්, නැවියන් සහ පොලිස් බලකායන් ගත් උත්සාහය ආරක්ෂක ලේකම්වරයාගේ පැසසුමට ලක්විය. “මෙම උත්සව සමයේදී ඔබගේ පවුල් පසෙකට දමා රට සහ එහි ජනතාව ආරක්ෂා කිරීම පිළිබඳව ඔබ සැමට මාගේ කෘතඥතාව පළ කරමි” යැයි ඔහු කියා සිටියා.
ආරක්ෂක ලේකම්වරයාගේ යාපනය, කිලිනොච්චි, මුල්ලයිටිව්, වවුනියා සහ ත්‍රිකුණාමලයේ පිහිටි ආරක්ෂක හමුදා මූලස්ථානය වෙත කළ සංචාරයේ දී ත්‍රිවිධ හමුදාව සහ පොලිස් නිලධාරීන් හමුවූ අතර ඔවුන් සුබ පැතුම් ද එක් කළේය. ජනාධිපති ගෝඨාභය රාජපක්ෂගේ සිංහල හා දෙමළ අලුත් අවුරුදු සුබ පැතුම් ද ඔවුන්ට පිරිනැමීය.
මෙම අවස්ථාවට ශ්‍රී ලංකා ගුවන් හමුදාවේ හමුදාපති එයාර් මාෂල් සුමංගල ඩයස්, යාපනය යුධ හමුදා ආඥාපති මේජර් ජෙනරාල් රුවන් වනිගසූරිය, යාපනය නියෝජ්‍ය පොලිස්පතිවරයා ඇතුළු යුධ, නාවික, ගුවන්, එස්ටීඑෆ් සහ පොලිස් නිලධාරීන් හා සෙබළුන් ද මෙම අවස්ථාවට සහභාගී වූහ.
