,
Covid-19

මාතෘ හා ළමා සායනවලට පැමිණෙන්නන්ට උපදෙස්

ගැබිණි මවුවරුන්ගේ සායන හා වයස අවුරුදු (05) පහට අඩු දරුවන්ගේ ප්‍රතිශක්තිකරණ සායන ඇරඹීමෙන් පසුව ඒවාට සහභාගී වීමේදී අනුගමනය කල යුතු සෞඛ්‍ය උපදෙස් මාලාවක් පිළිබඳව ශ්‍රී ලංකා සෞඛ්‍ය අධ්‍යාපන නිලධාරීන්ගේ සංගමය නිවේදනයක් නිකුත් කරමින් පෙන්වා දෙයි.

එම නිවේදනය මෙසේය.

“සෞඛ්‍ය අංශ මගින් ලබාදෙන උපදෙස් නිවැරදිව පිලිපදිමින් කොවිඩ්-19 (කොරෝනා) මර්දන සටනට ප්‍රශංසනීය දායකත්වයක් සමාජයේ බහුතරයක් දෙනා ලබාදුන් බව ශ්‍රී ලංකා සෞඛ්‍ය අධ්‍යාපන නිලධාරීන්ගේ සංගමයේ සභාපති නයනි විජේවික්‍රම පවසයි. රෝගය ව්‍යාප්ත වීම සාර්ථකව පාලනය කර ගැනීමට හැකිවී ඇතත් යලි දිවයිනේ කුමන හෝ ප්‍රදේශයකින් ආසාදිතයෙකු වාර්තාවීමේ අවදානම පහව ගොස් නැත. එබැවින් සෞඛ්‍ය උපදෙස් නිසි පරිදි පිලිපදිමින් කටයුතු කිරීමේ අවශ්‍යතාව අවධාරණය කෙරේ.

මේ අතර මාතෘ සායන සහ වයස අවුරුදු පහට අඩු දරුවන් වෙනුවෙන් පවත්වන සායන දිවයිනේ බොහෝ ප්‍රදේශවල කෙමෙන් සිය සේවා ලබාදීම සිදුකරමින් පවතී. තවමත් ආරම්භ නොවු සායන ඉදිරි දෙසතිය තුල සිය සේවා ලබාදීම අරඹනු ඇතැයි අපේක්ෂා කෙරේ. වයස අවුරුදු පහට අඩු දරුවන් සහ ගැබිණි කාන්තාවන් කොරෝනා රෝගයෙන් ආරක්ෂාවීම සදහා විශේෂයෙන්ම ඉතා සැලකිලිමත් විය යුතුය. එබැවින් මාතෘ හා ළමා ප්‍රතිශක්තිකරණ සායන ආරම්භ වීමත් සමගම ඒවායේ සේවා ලබාගැනීමට පැමිණීමේදී අනුගමනය කල යුතු සෞඛ්‍යාරක්ෂිත පියවර කිහිපයක් පිලිබදවද ශ්‍රී ලංකා සෞඛ්‍ය අධ්‍යාපන නිලධාරීන්ගේ සංගමය පෙන්වා දෙයි.

හැකි සෑම විටකම ගැබිණි කාන්තාව පමණක් එම අදාල සායනය සදහා පැමිණිය යුතුය. ඇයගේ සහායට අන් අය කැඳවා ගැනීම නොකල යුතුය. වයස අවුරුදු පහට අඩු දරුවන් සදහා ප්‍රතිශක්තිකරණ සායන සඳහා දරුවා සමග පැමිණිය යුත්තේ මව හෝ බාරකරු පමණි. කිසිම විටෙක සායනයට භාරකරු ලෙස වයස්ගත පුද්ගලයින් හෝ රෝගී පුද්ගලයින් සහභාගීවීම නොකල යුතුය. ඔවුන් කොවිඩ්-19 රෝගය සදහා අධි අවදානම් කාණ්ඩයක් ලෙස සැලකේ.

උණ, කැස්ස, උගුරේ වේදනාව, සෙම්ප්‍රතිශ්‍යාව වැනි රෝග ලක්ෂණ තිබේ නම් කිසිම අවස්ථාවක සායන සදහා පැමිණීම නොකල යුතුය. ඔවුන් 1390 හෝ 1999 දුරකතන අංක අමතා උපදෙස් ලබා ගැනීම සහ අවශ්‍ය අවස්ථාවල 1990 අංකය අමතා ඔවුන්ගේ සහායෙන් රෝහල් ගතවීම කල යුතුය.

කලට වේලාවට සායනයට පැමිණීම, තදබදයක් ඇති නොකර එකිනෙකා අතර මීටරයක පරතරය සහිතව සාවධානව තම වාරය එලඹෙන තුරු සිටීමද වැදගත්ය. සායන ගොඩනෑගිලි තුල නිකරුණේ කාලය ගත කිරීම නොකල යුතුය. කුඩා දරුවන්ද ඇතුළුව සායන සදහා සහභාගීවන සියලුම දෙනා මුඛ ආවරණ පැලඳීම අත්‍යවශ්‍ය වෙයි. සායන ගොඩනැගිල්ලට ඇතුලුවන විට එහි පිහිටුවා තිබෙන අත සෝදන ස්ථානයේදී සබන් යොදා නිසි පදි තත්පර විස්සක්වත් කාලය ගෙන දෑත් සේදීම කල යුතුය. එම නිසි ක්‍රමවේදය පිලිබද අවබෝධයක් නොමැති අය දැනුවත් කිරීමද සායන කාර්‍ය මණ්ඩලය විසින් සිදු කරනු ඇත. සමහර සායන වල දෑත් පිරිසිදු කර ගැනීමට විෂබීජ නාශක දියරද සපයනු ඇත.

සායන ක්‍රියාත්මක වන සෑම දිනකම එදිනෙදා මතුවන විශේෂිත තත්වයන්ට අනුව ලබාදෙන උපදෙස් සහ පොදු සෞඛ්‍ය උපදෙස් පිලිපදිමින් කොවිඩ්-19 ව්‍යාප්තිය අවම කරගැනීම කල යුතුය. එසේ සිය ජාතික යුතුකම ඉටු කරමින් සෞඛ්‍ය සේවා ලබා දීමේ වැඩපිලිවෙලට සහාය වෙමින් කොවිඩ් -19 ව්‍යාප්තිය පාලනයට දායක වන මෙන් ශ්‍රී ලංකා සෞඛ්‍ය අධ්‍යාපන නිලධාරීන්ගේ සංගමයේ සභාපති නයනි විජේවික්‍රම සමස්ත සේවා ලාභීන්ගෙන් ඉල්ලා සිටී.”

Rivira Ads
To Top