Covid-19

ශ්‍රී ලංකාවේ කොවිඩ්-19 ආසාදිතයින් 8,000 ඉක්මවයි, දින 20ක් තුළ ආසාදිතයින් දෙගුණ වෙයි

(RIVIRA.LK, 2020 ඔක්තෝම්බර් 26 පස්වරු 08.30ට)

ශ්‍රී ලංකාවේ දී වාර්තා වූ කොවිඩ්-19 ආසාදිතයින් සංඛ්‍යාව ඔක්තෝම්බර් 26 වන සඳුදා පස්වරු 06.45 වනවිට 8,152ක් දක්වා ඉහළ ගොස් තිබෙනවා. ඒ තවත් ආසාදිතයින් 280 දෙනෙකු හඳුනාගැනීමත් සමගයි. දිනය තුළ ආසාදිතයින් 130 දෙනෙකු සුවය ලබා රෝහල්වලින් පිටත් වී තිබෙනවා.

ශ්‍රී ලංකාවේ දී වාර්තා වූ ආසාදිතයින් ගණන 4,000 සීමාව ඉක්මවා ගියේ ඔක්තෝම්බර් 06 දිනයේ දී යි. ඒ බ්‍රැන්ඩික්ස් පොකුරේ ආරම්භයත් සමගයි. ඒ අනුව එතැන් සිට දින 20ක් ගත වන ඔක්තෝම්බර් 26 දිනයේ දී මෙරට දී හඳුනාගෙන ඇති සමස්ත ආසාදිතයින් 8,000 සීමාවත් පසු කර තිබෙන අතර දින 20ක් තුළ ආසාදිතයින් ගණන දෙගුණ වී තිබෙනවා.

ඒ අනුව, දිනය තුළ හඳුනාගත් නව ආසාදිතයින් 280 දෙනා අතුරින් වැඩිම පිරිසක් හමු වී ඇත්තේ පෑලියගොඩ මත්ස්‍ය වෙළඳපොළ උප පොකුර ආශ්‍රිතවයි.

  • නිරෝධායනයට ලක්ව සිටි – 15
  • පෑලියගොඩ මාළු වෙළඳපොළ හා ධීවර වරායන් ආශ්‍රිත – 265

ඒ අනුව, ආසාදිතයින් 265 දෙනෙකුම වාර්තා වී ඇත්තේ නිරෝධායන මධ්‍යස්ථානවලට පිටිනි. එසේම පෑලියගොඩ මත්ස්‍ය වෙළඳපොල හා ධීවර වරායන් ආශ්‍රිතව ඇති වූ උප පොකුරෙන් හමුවන ආසාදිතයින් ගණන වේගයෙන් ඉහළ යමින් තිබෙනවා.

එසේම Brandix කොරෝනා පොකුරේ සමස්ත ආසාදිතයින් ගණන 4,678 දක්වා ඉහළ ගොස් තිබෙනවා. එය මෙරටින් වාර්තා වූ සමස්ත ආසාදිතයින් ප්‍රමාණයෙන් 57% ඉක්මවූ ප්‍රමාණයකි.

ඒ අනුව, මේ වනවිට නිකුත් කර ඇති වාර්තා අනුව සුවය ලබා ඇති මුළු සංඛ්‍යාව 3,933කි. සමස්ත ආසාදිතයින් අතුරින් 16 දෙනෙකුට දිවි අහිමි වී තිබෙනවා. සක්‍රීය ආසාදිතයින් ගණන 4,203ක් දක්වා ඉහළ ගොස් තිබෙනවා.

Rivira FB Group Rivira Youtube
Rivira Ads
To Top