විපක්ෂ නායක සජිත් ප්‍රේමදාස සහ ඔහුගේ බිරිඳ වන ජලනි ප්‍රේමදාස කොරෝනා වෛරසය ආසාදනය වීමෙන් පසු සුවය ලබා ජුනි 11 දින පෙරවරුවේ රෝහලෙන් පිටත්ව ගොස් ඇති අතර තවත් පිරිසක් ද සමග ගංඟාරාම විහාරයට ගොස් ආශිර්වාද ලබාගෙන තිබෙනවා.
වෛරසය ආසාදනය වූ බව මැයි 22 දින හඳුනාගැනීමෙන් අනතුරුව පළමුව ජලනි ප්‍රේමදාස රෝහල්ගත කර තිබූ අතර පසුදිනයේ දී විපක්ෂ නායක සජිත් ප්‍රේමදාසට ද වෛරසය ආසාදනය වී ඇති බව හඳුනා ගැනීමෙන් අනතුරුව මැයි 23 දින රෝහල්ගත වී තිබුණි. ඒ අනුව මේ වනවිට ගත වී ඇත්තේ දින 19ක පමණ කාලයක් වන අතර සාමාන්‍ය ක්‍රමවේදය යටතේ ආසාදිතයෙකු සුවය ලැබීමෙන් පසු නිවෙස් නිරෝධායනයට යොමු කිරීම සිදුවෙයි.
කෙසේ නමුත් සංචරණ සීමා ද රට තුළ පනවා ඇති අවස්ථාවක තවත් පිරිසක් ද සමග විපක්ෂ නායක සජිත් ප්‍රේමදාස ගංඟාරාම විහාරස්ථානය වෙත ගියේ කෙසේදැයි ප්‍රශ්නයක් මතුවෙයි.
සාමාන්‍ය ජනතාවට ක්‍රියාත්මක නීතිය රටේ ප්‍රභූවරුන්ට ක්‍රියාත්මක නොවන්නේ ද යන ප්‍රශ්නය ඉතිරි කරමින් මෙම සිදුවීමද සාමාන්‍ය පරිදි බලධාරීන්ට හා ජනතාවට අමතක වී යනු ඇත.
Photos – Sajith Premadasa Facebook Page
