ශ්‍රී ලංකා රේගු දෙපාර්තමේන්තුව, දේශීය ආදායම් දෙපාර්තමේන්තුව සහ සුරාබදු දෙපාර්තමේන්තුවේ පවතින පුරප්පාඩු සඳහා විවෘත තරඟ විභාගයන් නොපැවැත්වීමට රජය තීරණය කර තිබෙනවා. ඒ අනුව එම තනතුරු සඳහා දැනට රජයේ සේවයේ නියුතු උපාධිධාරීන් බඳවා ගැනීමට තීරණයක් ගත් බව මුදල් රාජ්‍ය අමාත්‍ය රංජිත් සියඹලාපිටිය නොවැම්බර් 08 දින සඳහන් කළා.
ඒ අනුව, කැබිනට් මණ්ඩලයේ හා රාජ්‍ය සේවා කොමිෂන් සභාවේ අනුමැතිය සහිතව සීමිත තරඟ විභාගයක් මගින් එම දෙපාර්තමේන්තුවල පවතින පුරප්පාඩු සඳහා බඳවා ගැනීමේ ව්‍යාවස්ථාවන් උල්ලංඝනය නොවන පරිදි බඳවා ගැනීම් සිදුකරන බව ද රාජ්‍ය ඇමැතිවරයා අනාවරණය කර සිටියා.
මෙරට රාජ්‍ය සේවයේ ඉහළ වැටුප් හා දීමනා ලැබෙන රැකියා ලෙස රැකියා අපේක්ෂකයින් අතර ඉහළ ජනප්‍රියතාවයක් මෙම ආයතන සම්බන්ධයෙන් පැවතිණි. ඒ අනුව, සහකාර රේගු අධිකාරී වැනි තනතුරකට අයදුම් පත් 8000ත් 15000ත් අතර ප්‍රමාණයක් වරකට ලැබෙමින් තිබූ අතර ඉන් 50ත් 150ත් අතර ප්‍රමාණයක් පමණක් එම තනතුරු සඳහා බඳවා ගැනීම මීට පෙර සිදුවිණි.
